Hali Ba Dame (HABADA), iha loron 24 jullu 2024, hala’o enkontru kortezia ho Segundu Komandante Jerál Polísia Nasionál Timor-Leste (PNTL), Komisáriu Assistente Polísia Natércia Eufrásia Soares Martins, iha Kuartel Jerál PNTL, Caicoli , Dili, Timor-Leste.
Enkontru ne’e nia objetivu atu troka informasaun no fahe rezultadu monitorizasaun ne’ebé HABADA hala’o, inklui identifika progresu, dezafiu no oportunidade atu haforsa no hametin implementasaun programa Polisiamentu Komunitáriu iha nivel nasional. Alende nee, Diretor Ezekutivu HABADA, Sr. Abel Amaral, fahe mos relatoriu konaba Formasaun Seguransa Komunitaria iha Munisipoiu sira tanba atividade refere iha ligasaun direita ho programa Polisiamentu komunitaria.
Durante diskusaun, Segundu Komandante Jerál PNTL hato’o apresiasaun ba kontribuisaun organizasaun sosiedade sivíl sira, inklui HABADA, ne’ebé kontinua fó apoiu liuhusi monitorizasaun, advokasia no promosaun relasaun di’ak entre polísia ho komunidade. Nia mos reafirma katak kooperasaun no komunikasaun ne’ebé efetivu ho parseiru sira importante atu hametin servisu polísia ne’ebé profisionál, transparente no orientadu ba komunidade.
Diretor Ezekutivu HABADA, Abel Amaral, hato’o apresiasaun ba kolaborasaun ne’ebé PNTL demonstra durante implementasaun atividade Formasaun Seguransa Komunitáriu. Nia reafirma katak HABADA sei kontinua servisu hamutuk ho PNTL no parseiru relevante sira atu promove seguransa komunitária, dame no estabilidade, liuhusi abordagem Polisiamentu Komunitáriu ne’ebé inkluzivu no bazeia ba nesesidade komunidade.