HALI BA DAME (HABADA), Iha loron 26 Junhu 2025, hala’o Atividade Formasaun Seguransa Komunitaria iha Sede Suku Maudemo, Postu Administrativu Tilomar, Munisipiu Covalima.
Atividade nee fokus liu ba Membru konsellu Suku, Joventude, estudante, Komunidade no veteranu. Aleinde nee, HABADA mos involve Autoridade Postu, Munisipiu no Komando PNTL nivel Munisipiu.
Formasaun Seguransa Komunitaria ne’e ho ninia objetivu sira maka hanesan tuir:
Objetivu Jeral:
Hametin seguransa komunitária iha munisípiu prioridade sira liuhosi formasaun inkluziva, hodi promove ambiente seguru no kolaborativu ne’ebe haburas pás no estabilidade lokal.
Objetivu Espesifiku sira:
1) Estabelese sistema seguransa komunidade nian:
- Implementa rede lokal liuhosi autoridade lokal (suku no aldeia) hodi identifika risku no ameasa ba seguransa komunidade nian.
- Kria relatóriu regular sira ne’ebe informa polítika nível nasional no intervensaun estratéjiku sira.
2) Hametin kapasidade líder lokal no komunidade sira iha prevensaun konflitu:
- Treinu líder komunitáriu sira, inklui juventude no feto sira kona-ba rezolusaun konflitu.
- Hala’o formasaun prátika kona-ba identifika ameasa no dezenvolve estratéjia mitigasaun.
3) Kria mekanizmu kooperasaun entre komunidade sira, PNTL no autoridade lokal sira:
- Fasilita diálogu regular entre komunidade no forsa seguransa sira hodi hametin konfiansa ba malu.
- Dezenvolve protokolu klaru ba resposta konjunta ba insidente seguransa nian.
Programa ne’e hetan apoiu husi Gabinete de Apoio à Sociedade Civil – GASC.